Íþróttavikan kemur út á 433.is og í Sjónvarpi Símans alla föstudaga. Þar fá þeir Helgi Fannar Sigurðsson og Hrafnkell Freyr Ágústsson til sín góða gesti og í þetta skiptið mætti Þorgerður Katrín Gunnarsdóttir til þeirra félaga.

Sádi-Arabía hefur verið áberandi á félagaskiptamarkaðnum í sumar en deildin reynir að lokka til sín stærstu stjörnur Evrópu.

„Ég er alveg tilbúinn að hleypa eldri mönnum sem eru að klára ferilinn þangað. Það böggar mig ekki. En að leikmenn eins og Bernardo Silva séu nú orðaðir við lið þarna, það pirrar mig smá. Hann er á toppi ferilsins og maður vill sjá hann í bestu liðum Evrópu,“ segir Hrafnkell.

Þorgerður tók í sama streng.

„Eitt er að vilja byggja sig upp og margar þjóðir hafa gert það, en ekki á grunni óendanlegs fjármagns. Svo eru í bakgrunninum ótrúleg mannréttindabrot sem eiga sér stað þarna.

Þú vilt ekki útiloka þjóðirnar, frekar að reyna að tala fyrir mannréttindum. En mér er ekkert rosalega skemmt yfir þessu. Mér finnst leiðindabragur yfir þessu og mér finnst knattspyrnan vera komin í smá klípu. Fótboltinn í Katar var ekki bara í skugga mannréttindabrota heldur líka óendanlegs auðs, sem er allt í lagi svo lengi sem ákveðin prinsipp, gagnvart konum, öllum kynjum, séu í lagi. Á endanum verðum við að spyrja okkur að því hversu langt við ætlum að leyfa fjármagninu að stjórna.“

Umræðan í heild er í spilaranum.