Ragnhildur Þórðardóttir, betur þekkt sem Ragga nagli, fjallar í sínum nýjasta pistli á Facebook um trans fólk sem hún segir það sterkasta í heimi þar sem þau leggi á sig gríðarlegar breytingar líkamlega, andlega og félagslega.

„Alex Tilinca er transmaður sem keppir í vaxtarrækt. Alex fæddist í röngum líkama og fór í leiðréttingu 16 ára gamall.

Að mati Naglans er transfólk sterkasta fólk í heimi. Því þau leggja á sig gríðarlegar breytingar, líkamlega, andlega og félagslega, til að lifa í sínum sannleika. Því miður þurfa þau ennþá að þola fordóma og hindranir.

Í þessum heimi eru ennþá til litlar sálir með krullaða sveitta efrivör og krepptar tær í níðþröngum lakkskóm sem neita að skilja, eða hreinlega hafa ekki nægilega þroskaðan framheila til að virða rétt náungans til að ávarpa þau réttu nafni.“

Segir Ragga nagli sjálfsmynd sína ekki felast í að vera líffræðileg kona.

„Naglinn er eiginkona, dóttir, systir, frænka, vinkona, sálfræðingur, pistlahöfundur, fyrirlesari, heilsumelur, ræktarrotta og matarperri.

Kynleiðréttingarferli er ekki sjálfsmynd transfólks, heldur reynsla sem þau fara í gegnum. Sjálfsmynd þeirra er eins og okkar hinna.

Sonur, dóttir, vinur, vinkona, pabbi, mamma, frænka, frændi, starfsvettvangur og áhugamál.

Þegar öllu er á botninn hvolft erum við bara manneskjur.

Þið með krepptar tær þurfið ekki að skilja. En þið þurfið að bera virðingu. Og eyðið orkunni í að vera ekki fáviti, frekar en að hneykslast, rúlla augum, dæsa eða hamra ógeð á lyklaborðið.

Fögnum fjölbreytileikanum…. innan ræktar sem utan.“