Lengjudeild karla rúllaði af stað um síðustu helgi. Einn leikur fór fram í Boganum, leikstað sem mikið hefur verið í umræðunni undanfarin ár.
Þór tók á móti Vestra í Boganum og vann 2-1 sigur.
Það var útlit fyrir að grasvöllur Þórs utandyra hafi verið tilbúinn. Þrátt fyrir það var ákveðið að spila í Boganum, knattspyrnuhúsinu á Akureyri. Einhverjir gagnrýndu það.
Leikstaðurinn var til umræðu í markaþætti Lengjudeildarinnar hér á 433.is í gær. Þar fara Helgi Fannar Sigurðsson og Hrafnkell Freyr Ágústsson yfir leikina í deildinni eftir hverja umferð.
„Það er enginn aðdáandi Bogans eftir meiðslin sem hafa verið þar undanfarin ár,“ sagði Hrafnkell í þættinum. Hann tók þó fram að hann skildi Þór vel að hafa viljað spila í Boganum gegn Vestra.
Það er löngu orðið tímabært að skipta um gervigras í Boganum og fjöldi leikmanna meiðst þar undanfarin ár. Hrafnkell skaut á bæjaryfirvöld fyrir norðan.
„Akureyrarbær á skömmina fyrir að vera ekki búinn að skipta um gervigras. Þetta er eitt dæmi um það hvað bærinn er að sinna íþróttum illa.“
