Nýr landsliðsþjálfari Íslands, Age Hareide, var spurður út í Gylfa Þór Sigurðsson og hugsanlega endurkomu hans í íslenska landsliðið í viðtali við norska fjölmiðla.
Hareide var ráðinn landsliðsþjálfari fyrir helgi, sama dag og í ljós kom að Gylfi væri laus allra mála.
Norska blaðið Dagbladet spurði Hareide hvort hann hafi íhugað hvernig hann ætli að snúa sér varðandi Gylfa.
„Ég hef ekki gert það eins og er. Hann hefur ekki spilað lengi. Hann var mögulega besti leikmaður sem Ísland átti en endaði í hræðilegri stöðu. Vonandi reimar hann aftur á sig takkaskóna. Öll lið gætu nýtt sér hæfileika hans,“ sagði Hareide.
„Ég veit mjög lítið um málið svo ég vil skoða það nánar áður en ég tjái mig frekar.“
Hareide var einnig spurður út í möguleika Íslands í undankeppninni.
„Ég tel okkur eiga fína möguleika. Við erum að berjast við Slóvakíu og Bosníu. Þetta snýst um leikina gegn þeim. Portúgal er líklegast en kannski getum við strítt þeim á Íslandi.“
Hareide hlakkar til nýja starfsins og að vinna með íslenskum leikmönnum á ný, en hann hefur þjálfað menn eins og Kára Árnason og Hólmar Örn Eyjólfsson í félagsliðaboltanum.
„Ég hef þjálfað nokkra Íslendinga. Þeir leggja hart að sér og eru með gott hugarfar. Ég veit að þeir hafa það sem þarf til að ná langt á stóra sviðinu.“
