Einar Kárason, rithöfundur og Framari, var gestur Íþróttavikunnar með Benna Bó á föstudaginn ásamt Herði Snævari Jónssyni, íþróttastjóra Torgs. Þar var farið yfir víðan völl í heimi íþróttanna.

Það sem vakti mikla athygli í íþróttavikunni sem nú er að renna sitt skeið voru vandamál er komu upp í tengslum við VAR-dómgæslu í ensku úrvalsdeildinni. Arsenal var til að mynda beðið afsökunar á mistökum sem urðu á dómgæslu í leik liðsins gegn Brentford og þá var boðað til neyðarfundar hjá dómarasamtökunum ytra.

Benedikt Bóas vildi fá svör frá þeim Herði Snævari og Einari varðandi það afhverju það gengur svona illa með VAR í ensku úrvalsdeildinni.

,,Það hljóta að vera bara vanhæfir menn við störf,“ svaraði Hörður þá. ,,Eins og við sáum um síðustu helgi þegar að dómarar gleyma að teikna inn línuna á einum staðnum hjá Arsenal og svo þegar að þeir teikna línuna inn miðað við næst aftasta varnarmann þegar að Brighton setur inn sigurmark á móti Crystal Palace.“

Svo taki VAR-skoðunin í ensku úrvalsdeildinni alltaf svo langan tíma.

,,Það er það sem fer mest í taugarnar á manni. Þegar að maður horfir á leiki í Meistaradeild Evrópu eða á HM undir lok síðasta árs, þá eru bara teknar 10-15 sekúndur í að skoða atvikið og svo er málið út af borðinu.

Þegar að maður horfir á enska boltann er verið að zoom-a myndinni inn og út færa hana til hægri og vinstri, svo taka menn sér dágóðan tíma í að teikna inn línurnar (eða ekki). Það er alveg ljóst að menn þurfa að bæta þetta, þetta er bara leiðinlegt.“

Benedikt segir þetta lita illa út fyrir ensku úrvalsdeildina og Einar tekur undir það.

,,Þetta VAR-kerfi er að sumu leyti leiðinlegt en á sama tíma skiljanlegt og eðlilegt. Það verður hins vegar að virka sæmilega hratt, annars er verið að drepa niður tempóið og stemninguna í leikjunum.

Auðvitað fór það oft í taugarnar á manni að sjá lið vinna eða tapa á einhverju sem mætti teljast mjög ólöglegt mark, að því leytinu til ætti þetta kerfi að vera sanngjarnt en þetta má ekki vera þannig að fyrirkomulagið á þessu drepi niður allt með töfum og leiðindum.“

Nánari umræðu um ensku úrvalsdeildina og VAR má sjá hér fyrir neðan: