Íslenska kvennalandsliðið í knattspyrnu vann í dag afar góðan sigur á Skotlandi í fyrsta leik liðana á Pinatar Cup æfingamótinu sem fram fer á Spáni þessa dagana. Nýliðinn Ólöf Sigríður skoraði bæði mörk Íslands í 2-0 sigri.
Þorsteinn Halldórsson, landsliðsþjálfari Íslands stillti upp afar sterku byrjunarliði Íslands í leiknum en meðal sterkra leikmanna Íslands var Ólöf Sigríður Kristinsdóttir, leikmaður Þróttar Reykjavíkur, að leika sinn fyrsta landsleik.
Og Ólöf átti svo heldur betur eftir að láta til sín taka.
Þrátt fyrir að þær skosku hafi haft yfirhöndina í fyrri hálfleiknum og átt hvert færið á fætur öðru tókst þeim ekki að koma boltanum í netið.
Staðan í 0-0 í hálfleik en sú staða átti eftir að breytast í síðari hálfleik.
Ólöf Sigríður skoraði sitt fyrsta A-landsliðsmark í sínum fyrsta A-landsleik á 50. mínútu eftir stoðsendingu frá Öglu Maríu Albertsdóttur.
Þá var Ólöf aftur á ferðinni aðeins mínútu síðar er hún bætti við öðru marki sínu í leiknum og tvöfaldaði forystu Íslands. Hreint út sagt frábær frammistaða frá nýliðanum í fremstu línu íslenska landsliðsins.
Þetta reyndist lokamark leiksins og vann íslenska landsliðið því tveggja marka sigur á Skotlandi í fyrsta leik sínum á Pinatar Cup.
Næstu leikir Íslands á Pinatar Cup:
18. febrúar kl. 19:30 Ísland – Wales
21. febrúar kl. 19:30 Ísland – Filippseyjar
