Það er nóg um að vera á íslenska félagsskiptamarkaðnum þessa stundina. Ríkjandi bikarmeistarar Víkings Reykjavíkur hafa fest kaup á varnarmanninum Sveini Gísla Þorkelssyni frá ÍR. Þá hafa Keflvíkingar samið við danska markvörðinn Mathias Rosenorn.
Sveinn Gísli er fæddur árið 2003 og spilaði 15 leiki með ÍR á síðasta tímabili í 2. deildinni, í þeim leikjum skoraði hann 3 mörk. Hann gerir fjögurra ára samning við Víking Reykjavík.
Kári Árnason, yfirmaður knattspyrnumála hjá Víkingi er ánægður með að hafa náð að landa leikmanninum.
„Sveinn Gísli er mjög spennandi leikmaður sem hefur mikinn hraðar, styrk og er góð viðbót við frábæran hóp Víkings. Við bindum miklar vonir við hann í framtíðinni.“
Velkominn Gísli♥️🖤https://t.co/GTc1azYHje
— Víkingur (@vikingurfc) January 24, 2023
Þá hafa Keflvíkingar nælt í danska markvörðinn Mathias Rosenorn. Mathias er 29 ára gamall og kemur á frjálsri sölu til félagsins. Hann var síðast á mála hjá KÍ Klaksvík í Færeyjum en samningur hans við félagið rann út um síðustu áramót.
Mathias er uppalinn hjá Esbjerg í Danmörku og hefur lengst af á sínum ferli spilað með liðum í heimalandinu á borð við Brabrand IF, Skive IK og Thisted FC.
Í Færeyjum varð Mathias tvöfaldur landsmeistari með KÍ Klaksvík, tímabilin 20/21 og 21/22.
„Hann er fæddur 1993 og hefur leikið með Klaksvik í Færeyjum undanfarin 3 àr og unnið þar allt með þeim og var þar valinn besti markvörðurinn í deildinni. Hann lék með þeim í Evrópukeppni síðasta ár og stóð sig frábærlega. Við erum svo sannarlega spennt að fà Mathias til okkar í deild þeirra bestu,“ segir í tilkynningu frá knattspyrnudeild Keflavíkur.
Keflavík hefur gert samning við danska markvörðinn Mathias Rosenørn. Hjertelig velkommen til KEF🇩🇰⚽️💙 pic.twitter.com/uMzrWCK0hB
— Keflavík Fc (@FcKeflavik) January 24, 2023
