Reyksprengju var kastað inn á skemmtistaðinn Paloma Club í miðbæ Reykjavíkur í nótt. Skemmistaðurinn, sem er til húsa í Naustinni 1-3 ásamt Dubliner-kránni, var að öllum líkindum mannlaus samkvæmt frétt Morgunblaðsins en í henni er haft eftir varðstjóra slökkviliðsins á höfuðborgarsvæðinu að rúða hafi verið brotin og nokkurn reyk lagt út af skemmtistaðnum.
Telja má næst að víst öruggt að árásin tengist deildum tveggja hópa vegna hnífstunguárásarinnar í Bankastræti Club í síðustu viku. Líkt og DV greindi frá í byrjun vikunnar þá tengist einn af þeim sem situr í gæsluvarðhaldi vegna árásarinnar, John Pétur Vágseið, rekstri Paloma. Sambýliskona hans er rekstrarstjóri Paloma og var handtekin í aðgerðum lögreglu líkt og maki hennar. Ekki var þó farið fram á gæsluvarðhald yfir henni.
Þá birti DV í gær myndband þar sem sést hvar bensínsprengju er grýtt að glugga í fjölbýlishúsi en heimildir miðilsins herma að um sé að ræða heimili John Péturs og sambýliskonu hans í Árbæ. Þá hefur rignt hótunum yfir fjölskylduna.
316001991-5539357506149620-8893489757654620532-n-1
Eins og komið hefur fram rekur John Pétur dyravarðafyrirtæki sem býður upp á þjónustu fyrir nokkra skemmtistaði í miðborginni, þar á meðal Paloma Club. Nokkrir starfsmanna fyrirtækisins voru viðriðnir árásina á Bankastræti Club eins og John Pétur sjálfur. Rétt er þó að geta þess að DV hefur engar heimildir um að John Pétur hafi sjálfur beitt vopni á staðnum þó að hann hafi verið í hópnum sem ruddist inn á staðinn.
Síðustu daga hafa átt sér stað margar hefndarárásir í kjölfar hnífaárásarinnar. Þannig var tveimur eld- og reyksprengjum kastað í einbýlis í Hafnarfirði og Fossvogi í fyrrinótt.
