Arnar Þór Viðarsson, þjálfari karlalandsliðs Íslands er í viðtali við vefsjónvarp KSÍ fyrir leikinn gegn Litháen í Eystrasaltsbikarnum á miðvikudag.

Um er að ræða undanúrslitaleik mótsins, sem Ísland tekur þátt á í fyrsta sinn.

„Það er alltaf skemmtilegra að fá keppnisleiki, þó svo að þetta sé vináttuleikjagluggi fyrir okkur. Við ætlum okkur að vinna á miðvikudag og komast í úrslit,“ segir Arnar.

„Standið á hópnum er ágætt. Flestir voru að spila í gær og eru að ferðast í dag. Við vonumst til að fá alla í kvöld.“

Ísland hefur leik í undankeppni Evrópumótsins 2024 í mars næstkomandi. Segir Arnar þetta eins konar lokaundirbúning fyrir þá keppni.

„Við notum báða leikina í að skoða og gera síðustu tilraunir fyrir undankeppnina sem hefst í mars á næsta ári.“

Arnar er ánægður með starf landsliðsins síðastliðið ár eða svo.

„Að mínu mati er kjarninn orðinn stór og góður. Það er samkeppni í þessum hóp. Það eru leikmenn sem eru ekki hérna með okkur sem koma að sjálfsögðu til greina fyrir marsgluggann. Það er það jákvæða við hvað hefur gerst árið 2022 að við höfum náð að hnoða saman kjarnann af þessum hópi en hann er ekki 23 leikmenn. Það eru svona 30 leikmenn sem ég er ánægður með og þetta er sterkur hópur.“

Arnar telur að Ísland ætti að geta gert góða hluti í Eystrasaltsbikarnum.

„Við verðum að líta á andstæðinga okkar á þessu móti þannig að við eigum að vera sterkari aðilinn og eigum að geta stýrt þessum leikjum. En þetta verður alls ekki auðvelt. Þó við setjum stefnuna á sigur þurfum við að hafa mikið fyrir þessu.“

Hér að neðan má sjá viðtalið í fullri lengd.