Réttarhöldin yfir Benjamin Mendy, knattspyrnumanni hjá Manchester City, halda áfram.

Mendy er sakaður um sjö nauðganir, eitt kynferðisbrot og eina tilraun til nauðgunar. Atvikin eiga að hafa átt sér stað frá október 2018 til ágúst 2021.

Í réttarsal í gær sagði Mendy að hann hafi haldið mörg partí og sofið hjá mörgum konum síðustu ár. Hann hafi þó aldrei gert það gegn vilja þeirra.

Eleanor Laws, verjandi Mendy, spurði hann út í samband sitt við kvenfólk frá því hann varð atvinnumaður.

„Það var svo auðvelt ef ég á að vera hreinskilinn. Ég vissi það ekki fyrst en áttaði mig svo á því að þetta var af því hver ég er.“

Mendy segir að í partíunum sem hann hélt hafi konurnar yfirleitt reynt við hann.

„Ég var opinskár um hvað ég vildi og hvað þær vildu. Á þessum tíma var ég ekki að pæla í hvort þær gætu orðið leiðar. Ef ég vildi kynlíf og þær vildu kynlíf var það í góðu lagi. Ég hélt áfram með partíin mín. Ég stundaði kynlíf með mörgum konum.

Í flestum tilfellum komu þær til mín en stundum reyndi ég við þær.“

Laws spurði hann hvað hann hafi gert ef kona sagði nei við hann.

„Það var í góðu lagi. Ég samþykkti það og hætti. Ég vil stunda kynlíf með einhverri sem nýtur þess líka.“

Mendy viðurkenndi þó að hafa ekki alltaf komið fram við konur af virðingu. Þá segir hann að þrálát hnémeiðsli hans hafi ýtt undir partístand hans, þar sem hann hafi verið leiður vegna þeirra.