Roman Tkatjuk, yfirmaður öryggismála í borginni, sagði þetta í samtali við The New York Times. Hann sagði ljóst að ef Rússar halda áfram að ráðast á orkuinnviðina þá geti svo farið að þeir verði allir eyðilagðir.
Úkraínsk yfirvöld segja að raforkukerfi landsins hafi orðið fyrir miklu tjóni í árásum Rússa og af þeim sökum hefur þurft að skammta rafmagn og loka algjörlega fyrir rafmagn á ákveðnum svæðum um tíma.
Tkatjuk sagði nauðsynlegt að geta varað almenning við með 12 klukkustunda fyrirvara ef það stefni í algjört hrun raforkukerfisins. Ef svo fari verði fólki sagt að það verði að yfirgefa Kyiv.
Hann sagði að staðan sé þolanleg eins og er og ekkert bendi til að fjöldi fólks sé að fara að flýja borgina. En staðan getur breyst hratt að hans sögn ef ekki verður hægt að halda ýmsum kerfum, sem þurfa rafmagn, gangandi, til dæmis vatnsveitu og skólpkerfum.
Verið er að koma upp 1.000 hitamiðstöðum sem fólk getur leitað í undan árásum Rússa og til að halda hita á sér.
