Erling Braut Haaland hefur verið hreint magnaður fyrir Manchester City frá því hann kom til félagsins frá Borussia Dortmund í sumar. Daily Mail tók saman nokkrar af helstu venjum hans sem hjálpa honum að ná svo góðum árangri á vellinum.
Frá komu sinni til City hefur Haaland skorað 22 mörk í fjórtán leikjum í ensku úrvalsdeildinni og Meistaradeild Evrópu. Norski framherjinn hefur líklega farið fram úr björtustu vonum ljósbláa hluta Manchester-borgar.
Svefninn það mikilvægasta
Það er þó ekki að ástæðulausu að hinn 22 ára gamli Haaland er að ná öllum þessum árangri. Venjur hans og agi koma honum svo langt.
Í fyrsta lagi leggur Norðmaðurinn mikið upp úr góðum svefni. Hann segir hann jafnvel vera það mikilvægasta í lífinu. Nokkrum klukkustundum fyrir háttatíma setur hann upp gleraugu með bláu ljósi, en þau hindra annað truflandi ljós frá því að komast að augum hans.
Haaland fer að sofa á milli 22 og 22:30 flest kvöld. Þá er hann löngu búinn að slökkva á öllum raftækjum, þar sem ljósið frá þeim gæti truflað svefninn. Oft stillir hann símann sinn þannig að ekki er hægt að ná í hann á kvöldin.
Þá sefur Haaland með svokallaðan Oura-hring, en hann mælir stress, hjartslátt og segir til um gæði svefnsins.
Callum Walsh, sem starfaði sem íþróttafræðingur hjá Newcastle, segir Haaland vera ýktari útgáfuna af Zlatan Ibrahimovic. „Hann er meira eins og Cristiano Ronaldo. Það er allt algjörlega úthugsað.“
Borðar mikið prótein
Haaland hefur bætt á sig gríðarlegu magni af vöðvum frá því hann fór frá Molde í heimalandinu 2019. Fyrst hélt hann til RB Salzburg, síðan Dortmund og svo auðvitað City. Þar spilar mataræði stórt hlutverk.
Í dag vegur framherjinn um 90 kíló. Hann borðar allt að sex þúsund kaloríur á dag. Stór hluti af því er prótein. Haaland er alinn upp í Bryne í Noregi, þar sem mikil menning er fyrir því að borða próteinríkan mat.
Haaland borðar mikið af gæðanautakjöti. Þá borðar hann einnig hjörtu og lifur einnig.
Þegar það eru leikir og á leikdögum sérstaklega borðar Haaland þó meira af kolvetnum. Þar á meðal er lasagna sem faðir hans, Alf-Inge, gerir, líkt og hefur komið fram í fréttum áður. Þá borðar hann einnig fiskréttir.
Á síðustu leiktíð hjá Dortmund glímdi Haaland nokkuð við meiðsli og hefur Pep Guardiola, stjóri City, fengið íþróttafræðing félagsins til að fylgja Haaland eftir, jafnvel í landsliðsverkefni.
Allt þetta og fleira spilar inn í að hjálpa hinum magnaða Haaland að viðhalda árangri sínum og verða jafnvel enn betri.
