Vincent Kompany stjóri Burnley segist þekkja þann dimma stað sem Jóhann Berg Guðmundsson, kantmaður Burnley hefur verið á vegna meiðsla.

Jóhann var lengi fjarverandi á síðustu leiktíð vegna meiðsla en hefur á þessu tímabili verið í hóp og spilað í flestum leikjum Burnley.

„Ég er ánægður fyrir hans hönd því ég veit nákvæmlega hvar hann hefur verið,“ sagði Kompany.

Kompany glímdi við mikið af meiðslum um tíma hjá Manchester City þar sem hann var fyrirliði.

„Ég veit hversu dimmur dalur það getur verið fyrir atvinnumann með jafn mikla hæfileika eins og hann.“

Jóhann var á skotskónum hjá Burnley í miðri viku gegn Birmingham en hann var að skora sitt fyrsta mark í tuttugu mánuði.

„Ég skil stöðu hans vegna þess að ég hef verið í hans stöðu sem atvinnumaður. Ég get tengt við þetta.“

„Margir hafa afskrifað hann og breytt skoðun sínu á hann. Markið er gott, hann mun alltaf njóta þess að skora. Eftir langa fjarveru er það mikilvægasta að vera í hópnum. Þú lærir að meta litlu hlutina, að æfa á hverjum degi og leggja þitt að mörkum eins og Jóhann hefur gert. Svo er að vaxa og komast í liðið, það er besta leiðin.“

„Svo lengi sem hann er þolinmóður, skilar sínu á æfingum og í leikjum þá er það gott. Hann er mikilvægur leikmaður fyrir okkur.“