Hrekkjavakan er framundan og nú eru allskonar skrímsli í allskonar sælkerabúningum farin að láta á sér bera. Súkkulaðigerðin- og ísbúð Omnom býður upp á ógurlegar kræsingar í ævintýralegum sælkerabúningi. Nú hefur Varúlfurinn í Svartaskógi snúið aftur sem er hrekkjavöku-ísdesert Omnom og sló rækilega í gegn í fyrra.

„Innblástur okkar kemur frá hinni margrómuðu súkkulaðitertu frá Svartaskógi í Þýskalandi sem alla jafna inniheldur súr og sæt kirsuber, djúsí súkkulaðikökubotn sem Kirsh líkjör er dreypt yfir, þeyttum vanillurjóma og rifnu dökku súkkulaði til skrauts. Okkar túlkun á bragðævintýrinu er mjúkur vanilluís, kirsuberjasúkkulaðisulta með ögn af balsamik ediki til að leika við bragðlaukana, mjúk súkkulaðibrownie úr Madagascar 66% súkkulaðinu okkar sem tónar sérstaklega vel við rauðu berin og balsamik edikið. Efsta lag ísréttarins er svo stökkur súkkulaðikexmulningur, toppaður með súkkulaðiskógi og súrsætu kirusberja-balsamiksýrópi. Þessi ísdesert er algjört ævintýri fyrir bragðlaukana sem aðeins Grimms-bræðurnir hefðu getað búið til,“ segir Kjartan Gíslason súkkulaðigerðarmaður hjá Omnom sem elskar að útbúa kræsingar með súkkulaði ívafi.