Talsmenn Meta, móðurfélags Facebook, sögðu í gær að fyrirtækið hafi lokað rúmlega 1.600 aðgöngum sem voru notaðir til að dreifa rússneskum áróðri um stríðið í Úkraínu í Þýskalandi, Frakklandi, Bretlandi, Ítalíu og Úkraínu.

Segja talsmenn Meta að þetta sé stærsta og flóknasta netið tengt Rússum sem fundist hefur á samfélagsmiðlinum síðan Rússar réðust inn í Úkraínu.

Segja talsmennirnir að rúmlega 60 vefsíður hafi verið á vegum þessa nets. Vefsíður sem voru nánast afrit af vefsíðum venjulegra fréttasíða en í stað óháðs fréttaflutnings hafi þær verið lagðar undir rússneskan áróður um stríðið í Úkraínu.