Rósa Guðbjartsdóttir, bæjarstjóri Hafnarfjarðar, hefur svarað Viðari Halldórssyni formanni FH í kjölfars harðorðs pistils þess síðarnefnda um ákvörðun bæjarins um að reisa knatthöll á svæði Hauka við Ásvelli.

FH-ingar hafa á síðustu árum reist hús við sitt svæði með aðkomu bæjarins en Viðar segir framkvæmdina á Ásvöllum alltof dýra.

„Í dag virðast bæjaryfirvöld vera á lokametrum við ákvarðanatöku um byggingu nýs knatthúss á Ásvöllum sem að lágmarki mun kosta 4.5 milljarða, byggja einn fótboltavöll fyrir ámóta upphæð og kostar að byggja góðan grunnskóla eða fjóra leikskóla,“ skrifar Viðar meðal annars í pistli sínum.

Þá segir Viðar Hafnarfjarðarbæ fara illa með fjármuni bæjarins og að auðveldara væri að ráðast í mun ódýrari framkvæmd. Hann bendir á þá leið sem FH-ingar hafa farið með því að reisa yfirbyggðar knatthallir sem ekki eru upphitaðar.

Lesa má pistil Viðars í heild hér.

Rósa segir í svari við fyrirspurn Fréttablaðsins að Viðar fari frjálslega með tölur í pistli sínum og að orð hans komi ekki á óvart. „Þessi við­brögð koma mér ekki á ó­vart og því miður ekki í fyrsta sinn sem for­maður FH stígur svo harka­lega fram og berst gegn þessari fram­kvæmd. Held það hljóti að vera ein­stakt að for­svars­maður í­þrótta­fé­lags beiti sér svo ákaft gegn upp­byggingu í­þrótta­mann­virkis annars í­þrótta­fé­lags. Þarna er farið vægast sagt frjáls­lega með kostnaðar­tölur. Mikil þörf er á knatt­húsi á Ás­völlum enda er húsið er í þeim hluta bæjarins þar sem nær öll í­búða­upp­bygging síðustu ára hefur verið. Húsið mun þannig þjóna nýjasta hverfi bæjarins en í­búar þess verða um 13 þúsund innan nokkurra ára,“ segir Rósa.

Hún bendir einnig á að Haukar hafi afsalað sér hluta íþróttasvæðis síns til fjármögnunnar hússins. Bærinn fékk 1,3 milljarð króna upp í húsið með sölu þeirra lóða.

„Mikil undir­búnings­vinna hefur farið fram undan­farin ár vegna þessarar fram­kvæmdar. Þarna verður allrar hag­kvæmni gætt og þarna mun rísa hús sem mun nýtast vel. Allir flokkar studdu þessa upp­byggingu á Ás­völlum í síðustu kosningum og fyrsta verk nýrrar bæjar­stjórnar í sumar var að sam­þykkja að fara í út­boð vegna fram­kvæmdarinnar.“ 

Nánar er rætt við Rósu á vef Fréttablaðsins.