Arnar Sveinn Geirsson, formaður leikmannasamtaka Íslands, telur meðvirkni ríkja í KR með núverandi ástandi karlaliðs félagsins.
KR er í sjötta sæti Bestu deildarinnar, mun neðar en liðið ætlaði sér fyrir mót.
Arnar telur að leikmenn fái of mikla gagnrýni en ekki þjálfarinn Rúnar Kristinsson.
„Hver er það sem stýrir liðinu, sem fær leikmennina? Hvað er búið að gerast þarna síðustu 2-3 ár? Það er ekkert að frétta þarna,“ segir Arnar í hlaðvarpsþættinum Dr. Football.
Þá ræddi hann pistil sem Páll Kristjánsson, formaður knattspyrnudeildar KR, skrifaði fyrr í sumar, þar sem hann hvatti stuðningsmenn til að standa með liðinu á erfiðum tímum.
„Þar hélt þetta áfram, þessi meðvirkni með þessu. Hann var ekki bara að taka Rúnar fyrir, heldur allt félagið, stuðningsmenn og allir. Mér finnst það áframhald af einhverri meðvirkni í ástandi sem er ekkert að virka.“
„Mér finnst hann akkúrat dæmi um meðvirknina sem er í gangi. Stuðningsmenn eru einhvern veginn dregnir inn í það, að þeir eigi sinn þátt í að það gangi ekki nægilega vel. Má ekki bara fara beint í vandamálið eins og það er?“