Heimir Hallgrímsson mun taka við karlaliði Vals eftir tímabilið, ef marka má færslu Kristjáns Óla Sigurðssonar sparkspekings.

Fyrrum landsliðsþjálfarinn hefur aðstoðað Hermann Hreiðarsson með ÍBV á þessari leiktíð en var ekki á skýrslu í síðasta leik.

Kristján segir Heimi hættan hjá ÍBV og að hann muni taka við Val.

Ólafur Jóhannesson er þjálfari Vals sem stendur. Hann tók við eftir að Heimir Guðjónsson var látinn fara fyrr á tímabilinu. Ólafur gerði samning út leiktíðina.

Heimir Hallgrímsson var sterklega orðaður við Val þegar nafni hans var látinn fara en ekkert varð af því að hann tæki við þá.

Valur er í fjórða sæti Bestu deilar karla sem stendur. Liðið gerði 1-1 jafntefli við Fram í gær. Valsmenn eru þrettán stigum á eftir toppliði Breiðabliks, þegar þrjár umferðir eru eftir fram að tvískiptingu deildarinnar.

Heimir Hallgríms tekur við Val 5 mánuðum seinna en ég gerði ráð fyrir. Hættur að aðstoða Eyjamenn. Góðar stundir.#HeimavinnaHöfðingjans

— Kristján Óli Sigurðsson (@kristjanoli) August 29, 2022