Kári Kárason, sem særðist alvarlega af haglabyssuskoti þegar vopnaður maður ruddist inn á heimili hans og eiginkonu hans, Evu Hrundar Pétursdóttur á Blönduósi aðfaranótt 21. ágúst og skaut þau, er kominn til meðvitundar. Lögreglan stefndi að því að yfirheyra hann í gær.

Fréttablaðið skýrir frá þessu í dag. Páley Borgþórsdóttir, lögreglustjóri á Norðurlandi eystra, staðfesti í samtali við blaðið að stefnt væri að því að taka skýrslu af honum. Það er lögreglan á Norðurlandi eystra sem fer með rannsókn málsins.

Eva Hrund lést í árásinni og Kári særðist lífshættulega þegar hann fékk skot í kviðinn.

Fréttablaðið hefur eftir aðstandanda Kára að bati hans virðist framar öllum vonum.

Nánar er hægt að lesa um málið í Fréttablaðinu í dag.