Alex Le Tissier, tengdadóttir Southampton-goðsagnarinnar Matt Le Tissier, hefur greint frá því að kynlífsmyndband af henni og eiginmanni hennar hafi verið lekið á netið. Hún er hrædd um að börn þeirra fjögur muni einn daginn sjá það.

Alex heldur úti OnlyFans-reikningi, þar sem aðdáendur geta keypt sér aðgang að kynferðislegu efni með henni. Hún segir kynlífsmyndbandinu hafa verið lekið af „lágkúrulegum“ áskrifanda þar.

„Mér varð strax óglatt þegar ég frétti að því hafi verið lekið. Þetta er ógeðslegt að mínu mati,“ segir Alex.

„Ég veit að margir munu lesa þetta og hugsa að ég hafi sjálf komið mér í þessa stöðu, en fólk þarf að skilja hvað samþykki er. Ef þú kaupir þér aðgang að efninu mínu á OnlyFans er það með samþykki. Þú mátt skoða þessar myndir og myndbönd eins og þú vilt. Það þýðir hins vegar ekki að þú megir sýna heiminum þetta.“

Alex hefur áhyggjur af því að börn hennar geti nálgast efnið. „Ég hef áhyggjur af því að þau geti flett upp nafninu mínu og fundið þetta. Þetta efni er læst á OnlyFans-reikningi mínum af ástæðu.“