Arnór Ingvi Traustason er mættur aftur til Svíþjóðar og hefur skrifað undir samning hjá Norrköping. Sænska félagið hefur staðfest þetta.
Arnór kemur til Svíþjóðar frá New England í Bandaríkjunum þar sem hann hefur verið síðustu ár.
Arnór verður þriðji Íslendingurinn sem Norrköping fær í sumar en áður höfðu Arnór Sigurðsson og Andri Lucas Guðjohnsen samið við félagið. Fyrir voru Ari Freyr Skúlason og Jóhannes Kristinn Bjarnason í herbúðum liðsins.
Arnór lék með Norrköping frá 2014 til 2016 en fór þaðan til Austurríkis. Hann snéri svo aftur til Svíþjóðar og lék með Malmö áður en hann hélt til Boston í Bandaríkjunum.
