Stefán Ingi Sigurðarson lék sinn síðasta leik fyrir HK í 0-1 sigri gegn Aftureldingu í Lengjudeildinni á föstudag. Hann er á leið aftur út til Bandaríkjanna, þar sem hann stundar háskólanám.

Framherjinn hefur farið á kostum í sumar og skorað tíu mörk í þrettán leikjum í Lengjudeildinni.

„Það vill enginn missa hann,“ sagði Hrafnkell Freyr Ágústsson sparkspekingur í markaþætti Lengjudeildarinnar á Hringbraut í gær.

HK er hins vegar á toppi deildarinnar, tíu stigum á undan þriðja sæti og á góðri leið með að komast upp í Bestu deildina. „Hann getur flogið sáttur út, hann er búinn að koma þeim upp,“ sagði Hrafnkell.

Stefán Ingi er á láni hjá HK frá Breiðabliki. Hrafnkell telur að hann gæti spilað hlutverk þar. „Þeir gætu komið honum inn í þetta hjá sér, hvort sem hann yrði varasenter eða í einhverju hlutverki. Annars væri ég meira til í að sjá hann í HK númer eitt, hann er það góður.“

„Hann myndi gefa Blikum eitthvað annað. Hann er góður í pressu og getur hlaupið eins og brjálæðingur. Hann er geggjaður í loftinu, með tækni miðað við hæð. Hann mun valda usla í efstu deild, ég get lofað ykkur því.“w