Dan Gosling, leikmaður Watford, hefur látið leikmenn liðsins heyra það eða leikmenn sem spiluðu með liðinu á síðustu leiktíð.

Watford gat í raun ekkert í ensku úrvalsdeildinni síðasta vetur og féll úr efstu deild, 15 stigum frá öruggu sæti.

Gosling er 32 ára gamall og kom til Watford árið 2021 en hann hefur einnig leikið með Everton, Newcastle og Bournemouth.

Hann upplifði versta andrúmsloft ferilsins hjá Watford í fyrra þar sem leikmenn voru búnir að sætta sig við það að liðið væri á leið niður um deild og var í raun alveg sama.

,,Við spiluðum með leikmönnum sem mættu á æfingu og sögðust vera búnir að fá nóg,“ sagði Gosling.

,,Liðið var á botninum og við vorum með leikmenn sem vissu að þeir væru á förum. Leikmennirnir sættu sig við það og sögðust vera búnir hérna og vera á förum annað.“

,,Að mínu mati var þetta viðhorf til skammar. Viðhorf margra var til skammar á síðustu leiktíð og það var ástæðan fyrir því að við fórum niður. Þetta snerist ekki um getu. Kannski spiluðu ekki allir leikmenn sinn besta leik en þetta snerist allt um viðhorfið.“

,,Þetta var til skammar. Þetta var auðveldlega versti búningsklefi sem ég hef verið hluti af. Að við séum að endurnýja í dag er gott fyrir félagið.“