Sú spurning vaknar hvort uppsagnir millistjórnenda og annars skrifstofufólks gætu verið framundan á Landspítalanum eftir ummæli Björns Zoëga, nýkjörins stjórnarformanns spítalans, í Morgunblaðinu í morgun.

Willum Þór Þórsson heilbrigðisráðherra kynnti nýja stjórn Landspítalans í gær og er Björn stjórnarformaður. Hann gegnir eftir sem áður starfi forstjóra Karólínska-sjúkrahússins í Svíþjóð, þar sem hann hefur gert miklar breytingar og eflt mjög rekstur stofnunarinnar.

Það kveður við svipaðan tón og í fyrri viðtölum við Björn þar sem hann lýsti rekstrarbreytingum sínum í Svíþjóð í viðtalinu í Morgunblaðinu dag. Segir Björn að á Landspítalanum vinni allt of margt fólk sem vinni ekki við að þjónusta sjúklinga og hafi fjöldi þeirra aukist meira en þeirra sem vinna við þjónustu við sjúklinga. Segir hann að meta þurfi starfsmannaþörf Landspítalans og einfalda reksturinn. Þurfi meðal annars að skoða hvort millistjórnendur séu of margir.

Björn tók við starfi forstjóra Karólínska-sjúkrahússins árið 2019. Það kom fram í viðtali hans við Dagmál Morgunblaðsins í fyrra að hann hefði sagt upp 550 millistjórnendum og skrifstofumönnum. Á sama tíma hefði hann fimmfaldað gjörgæsluna á sjúkrahúsinu.

DV hafði samband við Björn og spurði hvort lesa mætti út úr viðtali hans við Morgunblaðið í dag að von væri á uppsögnum millistjórnenda og skrifstofufólks á Landspítalanum. Björn hvort neitar því né játar en svar hans er eftirfarandi:

„Frekari greining með nýjustu tölum þarf áður en forstjóri í samráði við stjórn tekur slíkar ákvarðanir.“

Ragnar Freyr Ingvarsson, sérfræðingur í lyf- og gigtarlækningum, er ánægður með tóinn í viðtali Morgunblaðsins við Björn. Ljóst er að hann telur æskilegar breytingar vera í vændum. Ragnar ritar á Facebook-síðu sína:

„Það er frískandi að sjá viðtal við stjórnarformann LSH (og fyrrv. forstjóra) Björn Zoega. Hann staðfestir það sem við á gólfinu hefur lengi grunað – einfalda þarf stjórnskipulag spítalans, fækka millistjórnendum og valdefla starfsfólk á gólfinu sem sinnir sjúklingum.“