Að semja við Manchester United er ekki á óskalista miðjumannsins Christian Eriksen sem er eftirsóttur þessa dagana.

Eriksen spilaði afar vel með Brentford á síðustu leiktíð og samkvæmt Times hefur Man Utd boðið leikmanninum samning á Old Trafford.

Erik ten Hag er nýr hollenskur stjóri enska stórliðsins og er aðdáandi Eriksen sem lék áður með Ajax þar í landi.

Guardian greinir hins vegar frá því að það sé ekki vilji Eriksen að ganga í raðir Man Utd og horfir hann aðeins til eins félags.

Tottenham er eina liðið sem kemur til greina fyrir Eriksen en hann lék þar lengi við góðan orðstír áður en hann hélt til Inter Milan.

Ef Tottenham reynist ekki valkostur fyrir Eriksen mun hann vilja skrifa undir framlengingu við Brentford en samningur hans rennur út á næstu dögum.