Wikimedia Foundation, sem á Wikipedia, var nýlega dæmt til að greiða sem svarar til um 12 milljóna íslenskra króna í sekt fyrir að neita að fjarlægja það sem Rússar kalla „rangar upplýsingar“ um stríðið í Úkraínu. Það var dómstóll í Moskvu sem kvað dóminn upp. En Wikimedia hefur ekki í hyggju að fara að kröfum Vladímír Pútíns, Rússlandsforseta, og hans fólks og fjarlægja upplýsingar um innrás Rússa í Úkraínu.

Þessar „röngu upplýsingar“ voru greinar um stríðið á rússnesku útgáfu Wikipeda. Þar eru meðal annars greinar sem heita: „Rússneska innrásin í Úkraínu“, „Stríðsglæpir í innrás Rússa í Úkraínu“ og „Fjöldamorðin í Butja“.

Wikimedia Foundation hefur áfrýjað niðurstöðu dómstólsins og segir að það sé brot á mannréttindum að fjarlægja upplýsingarnar því fólk eigi rétt á að vita staðreyndir um stríðið. Auk þess bendir Wikimedia Foundation á í áfrýjun sinni að Rússar hafi ekki lögsögu yfir Wikimedia Foundation og geti því ekki kveðið upp dóma yfir fyrirtækinu.

Wikipedia á rússnesku er meðal síðustu stóru erlendu vefsíðnanna sem enn eru opnar fyrir Rússa en stjórnvöld hafa lokað mörgum vefsíðum og stunda harða ritskoðun á öðrum til að halda staðreyndum um stríðið frá almenningi.