Hörður Björgvin Magnússon, varnarmaður íslenska karlalandsliðsins í knattspyrnu mun ekki ferðast með liðinu í komandi verkefni liðsins sem er æfingarleikur gegn San Marínó á útivelli. Hörður og unnusta hans, Móeiður Lárusdóttir eiga von á öðru barni sínu á næstu dögum.

Í viðtali eftir leik  gegn Albaníu í Þjóðadeild UEFA í gær Hörður frá því að hann hafi verið með einstakling tilbúinn á vellinum til þess að koma skilaboðum áfram ef hlutirnir myndu þróast þannig að komið væri að fæðingu barnsins á meðan á leiknum stóð.

Skilaboðum hefði þá verið komið áfram á þjálfarateymið sem hefði þá geta brugðist við með því að taka Hörð af velli svo hann gæti verið viðstaddur fæðingu barnsins.

Arnar Þór Viðarsson, landsliðsþjálfari íslenska karlalandsliðsins var spurður að því á blaðamannafundi eftir leik gærkvöldsins hvort hann myndi gera breytingar á landsliðshópnum fyrir æfingaleikinn gegn San Marínó. Arnar greindi þá frá því að Hörður yrði eftir hér á landi sökum þess að von væri á fæðingu barns í fjölskyldunni á næstu dögum.

Í morgun var síðan greint frá því að nokkrar breytingar hafi verið gerðar á leikmannahópi landsliðsins  fyrir vináttuleikinn við San Marínó. Birkir Bjarnason, Hörður Björgvin Magnússon og Alfons Sampsted fara ekki með liðinu til San Marínó og Bjarki Bjarkason færist í U21 landsliðið.

Inn í hópinn fyrir leikinn við San Marínó koma Jason Daði Svanþórsson, Damir Muminovic og Höskuldur Gunnlaugsson úr Breiðabliki, og Júlíus Magnússon úr Víkingi R.