Maðurinn sem grunaður er um að hafa orðið manni að bana með barsmíðum í húsi að Barðavogi í gærkvöld var íbúi í húsinu. Hinn grunaði er fæddur árið 2001. Hinn látni er á milli fertugs og fimmtugs. Náin tengsl eru sögð hafa verið á milli mannanna.
DV náði sambandi við íbúa úr einu af næstu húsum. Sagðist hann ekki hafa orðið var við neitt fyrr en lögreglubíll kom að húsinu. Nágranninn sá hins vegar hinn grunaða leiddan burtu í handjárnum.
Íbúinn vildi lítið tjá sig um málið að öðru leyti en því að hann áliti það vera mannlegan harmleik. „Ég varð ekki var við neitt fyrr en lögregla kom á vettvang.“ Maðurinn sagðist ekki hafa orðið við læti eða átök. „Þetta gekk mjög hljóðlega fyrir sig og engin átök eftir að löggan kom.“
„Ég gat séð að það var verið að fara burtu með strákinn.“ – Maðurinn staðfestir að hinn grunaði væri íbúi í húsinu. „Ég veit ekki hver aðdragandinn að þessu hefur verið en þetta er mjög sorglegt. Ég myndi lýsa þessu sem harmleik sem gerist.“
Íbúinn sagðist geta slegið því föstu að hinn grunaði hefði engin tengsl við undirheima. Hann gæti ekki fullyrt það um hinn látna, hafði ekki upplýsingar um það. Nágranninn sagðist lítið sem ekkert vita um hinn látna en lögregla hefur þegar veitt þær upplýsingar að hann sé á fimmtugsaldri. Nágranninn sagðist enga grein gera sér fyrir því hver gæti verið ástæða verknaðarins að öðru leyti en því að hann teldi þetta vera mannlegan harmleik.
Samkvæmt RÚV voru mennirnir nágrannar. Í frétt Fréttablaðsins kemur fram að lögreglan var að minnsta kosti kölluð til tvisvar að húsinu í Barðavogi síðasta sólarhringinn áður en maðurinn fannst látinn þar.
