Orri Steinn Óskarsson skrifaði í dag undir nýjan samning við Danmerkurmeistara FC Kaupmannahöfn sem gildir til ársins 2025. Leikmaðurinn leikur með aðalliðinu á næstu leiktíð en félagið staðfesti þetta á heimasíðu sinni í dag.

Orri Steinn er 17 ára gamall og kom til FCK frá Gróttu árið 2020. Hann er markahæsti leikmaður U19 liðs FCK  á leiktíðinni með 29 mörk fyrir síðustu umferðina á sunnudaginn og á síðustu leiktíð varð hann markahæstur U17 ára, einnig með 29 mörk og skoraði auk þess 10 sinnum fyrir U19.

Það gera 68 mörk í heildina á tveimur tímabilum með svonefndri hæfileikadeild FCK.

„Tölfræðin sýnir að Orri býr yfir einstökum hæfileikum sem við munum nú færa inn í aðalliðið,“ segir Peter Christiansen, íþróttastjóri hjá félaginu á heimasíðu klúbbsins.

„Hann er alræmdur markaskorari á unglingastigi og hefur ekki bara sýnt það með okkur heldur líka með yngri landsliðum Íslands.“

Íslendingarnir Hákon Arnar Haraldsson, Ísak Bergmann Jóhannesson og Andri Fannar Baldursson eru einnig á mála hjá FCK.

U19-topscorer Orri Óskarsson har forlænget sin kontrakt med FCK og rykkes op på førsteholdet forud for den kommende sæson. Hør ham fortælle om to utrolige år i klubben, den nye kontrakt, de mange mål og forventningerne til fremtiden 👇🏼 #fcklive #sldk https://t.co/NKbFJXnua5

— F.C. København (@FCKobenhavn) May 25, 2022