Myndbönd sem sýnd voru í dómssal í dag varpa ljósi á hræðilega framkomu Kurt Zouma, leikmanns West Ham United og bróður hans Yoan í garð tveggja katta sem voru í eigu þess fyrrnefnda.

Myndband af Kurt að sparka og slá til kattar sín birtist í enskum miðlum í febrúarmánuði en Yoan bróðir hans hafði tekið myndbandið upp. Kurt Zouma, leikmaður West Ham United, sagðist í dómssal í dag hafa gerst sekur um dýraníð í tveimur brotum sem hann þarf að svara fyrir í dómsmáli gegn sér.

Bæði Kurt Zouma og Yoan horfðu niður til jarðar þegar að myndböndin voru sýnd í dómssal í morgun og saksóknarinn í málinu, Hazel Stevens, segir Zouma hafi sparkað í annan köttinn líkt og hann myndi sparka í fótbolta. Framkoma þeirra við kettina tvo hafi haft þær afleiðingar að kettirnir hafi hlotið áverka og orðið fyrir áfalli sem geri þá hræddari við manneskjur í framhaldinu.

Þá varpaði hún ljósi á það sem Kurt Zouma segir í myndböndunum: ,,Ég sver að ég drep hann.“ og ,,Ég slæ þig“ er á meðal þeirra orða sem Zouma lét falla.

Í dómsmálinu sem höfðað er gegn honum er Zouma sakaður um að láta köttinn sinn ganga í gegnum þjáningu að óþörfu og að vernda hann ekki fyrir meiðslum. Zouma hefur haldið áfram að leika með West Ham allar götur frá því að málið kom upp. Við það eru margir ósáttir.

Zouma gæti átt yfir höfði sér allt að fimm ára fangelsisdóm en refsingar fyrir dýraníð voru þyngdar í Bretlandi á síðasta ári. Dómur verður felldur þann 1. júní næstkomandi. Hann játaði sekt sína í morgun í tveimur ákæruliðum. Um að hafa valdið vernduðu dýri „óþarfa þjáningu, með því að sparka í og ​​slá kött“, sem er í bága við 4. lið 1. undirliðs dýravelferðarlaga í Bretlandi. Þriðji ákæruliðurinn sem sneri að því að Zouma hefði ekki verndað kött sinn fyrir meiðslum var felldur niður.