Elvis Bwomono, landsliðsmaður Úganda er nýr leikmaður ÍBV sem leikur í Bestu deildinni. Um er að ræða 23 ára bakvörð sem á að baki nokkra landsleiki fyrir Úganda og ljóst að nafn hans mun falla vel í kramið hjá Hermanni Hreiðarssyni, þjálfara ÍBV, sem er mikill aðdáandi Elvis Presley, söngvarans goðsaganakennda.

ÍBV situr í 9. sæti Bestu deildarinnar með 2 stig eftir fyrstu fjórar umferðir deildarinnar og vonir standa til að Elvis nái að lyfta þeim hærra upp í töflunni en ÍBV hefur fengið á sig níu mörk í upphafi leiktíðar.

Eins og áður sagði er Hermann Hreiðarsson, fyrrum atvinnu- og landsliðsmaður í knattspyrnu mikill aðdáandi Elvis Presley og hann sagði frá því í viðtali við staðarmiðil í Portsmouth árið 2015 að hann hefði klætt sig upp sem Elvis fyrir bikarúrslitaleik ensku bikarkeppninnar árið 2008 og sungið fyrir liðsfélaga sína í Portsmouth.

Frammistaða Hermanns í aðdraganda bikarúrslitaleiksins virðist hafa gert liðinu gott því Portsmouth hafði betur í leiknum og varð enskur bikarmeistari.

Hermann tók nokkur lög með Elvis þetta umrædda kvöld fyrir bikarúrslitaleikinn þar sem að liðið snæddi kvöldverð á ítölskum veitingastað. ,,Ég tók Blue Suede Shoes fyrst, lag sem hægt er að dansa við og það er gott til þess að draga athyglina frá röddinni. Svo reyndi ég við An American Trilogy, það var metnaðarfullt og ég viðurkenni að það vera meira hlegið að mér þá.“

Hermann segir að það hafi verið hugmynd Harry Redknapp, knattspyrnustjóra Portsmouth að hann myndi stíga á svið í klæddur Elvis búningi og taka nokkur lög. ,,Við héldum þessu á milli okkar og allt í einu kom ég út af klósettinu klæddur sem Kóngurinn og það kom öllum að óvörum. Með þessu vildum við ná athygli leikmanna frá úrslitaleiknum í stutta stund, ná fram rólegu andrúmslofti og þetta heppnaðist,“ sagði Hermann Hreiðarsson í samtali við Played up Pompey árið 2015.

Þá er mörgum ferskt í minni þegar að Hermann tók lagið í þáttaröðinni Atvinnumennirnir okkar hjá Auðunni Blöndal.