Fjallað var um stöðu FH í hlaðvarpsþætti Fótbolta.net sem birtur var í gær. Það blæs á móti í Kaplakrika í upphafi móts bæði innan sem utan vallar.
Eggert Gunnþór Jónsson var settur til hliðar eftur fyrstu umferð. Eggert liggur undir grun um kynferðisbrot var lögð fram kæra gegn honum og Aroni Einari Gunnarssyni af íslenskri konu síðasta haust. Lögregla hefur lokið rannsókn en málið er á borði héraðssaksóknara sem tekur ákvörðun um hvort ákært verði í málinu eða ekki.
Elvar Geir Magnússon ritstjóri Fótbolta.net sagði frá því í hlaðvarpinu að Ólafur hefði labbað úr viðtali hjá Fótbolta.net í annari umferð.
„Það er pirringur í FH-ingum, Óli Jó hefur ekki verið ánægður með fjölmiðlamenn og ekki ánægður með spurningar um Eggert Gunnþór. Hann lét Gulla Jóns heyra það í fyrstu umferðinni og svo labbaði hann út úr viðtali við Fótbolta.net sem hann Anton tók, hann ætlaði að spyrja út í liðsstyrkingar í ljósi þess að Eggert Gunnþór væri farinn út. Hann byrjaði spurninguna á að tala um Eggert Gunnþór og þá labbaði Óli Jó burt,“ sagði Elvar Geir.
„Það er ekki gott eftir þrjá leiki, við erum að byrja maí. Að vera kominn í stríð við fjölmiðla,“ sagði Benedikt Bóas Hinriksson blaðamaður á Fréttablaðinu.
FH tapaði gegn Breiðablik um liðna helgi en FH Mafían á Facebook kallaði eftir því að Valdimar Svavarsson formaður knattspyrnudeildar myndi axla ábyrgð en FH er með þrjú stig eftir þrjár umferðir í Bestu deildinni.
„Það er dramatík bak við tjöldin, FH mafían er með account á Facebook og skrifaði að þetta væri til skammar og að Valdimar Svavarsson ætti að taka ábyrgð. Það er ólga á bak við tjöldin,“ sagði Elvar Geir og las upp svar þar sem Jón Erling Ragnarsson formaður meistaraflokksráð svaraði stuðningsmönnum.
„Svo það sé sagt hér fyrir þa sem ekki vita í þessari stuðningsmannagrúbbu þá er Valdi formaður knattspyrnudeildar, en þeir sem er ábyrgir fyrir leikmannahópnum og samningum og ættu þvi samkvæmt þessu að axla ábyrgð eru undirritaður sem formaður meistaraflokksráðs og Bjarni Þór Viðars samherji minn og Davið Þor Viðars nylega raðinn sem yfirmaður knattspyrnumala! Við ætlum hinsvegar ekki að víkja frekar en Valdi, enda höfum við verk að vinna! Eg ætla samt ekki að vera með neitt ávarp til ykkar – en hvet ykkur i FH mafíunni að reyna leita i jákvæðnina þegar hlutirnir falla ekki með okkur! Horfa kannski á heildarmyndina og þa sem eru farnir eða voru fjarverandi i gærkvöldi! Styðja liðið og nyja leikmenn sem margir eru ungir efnilegir uppaldir FH-ingar! Betra liðið vann i gær, en það er nog eftir af þessu móti! Væri frábær byrjun að mæta allir i krikann á föstudaginn og styðja okkar menn i erfiðum leik, þar sem eg er sannfærður að strákarnir okkar ætla ná í úrslit,“ skrifaði Jón Erling.
Nokkrir stuðningsmenn FH leggja orð í belg á síðu FH mafíunnar þar sem tekist er á um hlutina.
