Hólmar Örn Eyjólfsson er kominn heim til Íslands eftir meira en þrettán ár í atvinnumennsku. Hann ætlar að taka slaginn með Val í Bestu deildinni á komandi leiktíð. Miðvörðurinn lék á ferli sínum í atvinnumennsku í Noregi, Ísrael, Búlgaríu, Þýskalandi, Belgíu og á Englandi. Hólmar Örn fór yfir ferilinn og komandi tímabil með Val í sjónvarpsþætti 433.is á Hringbraut á þriðjudagskvöld.

„Við tókum ákvörðun eftir síðasta tímabil í Noregi, vorum komin heim, konan komin með góða vinnu. Ég sá að það væri kannski möguleiki á að koma heim á fínum aldri og gera eitthvað,“ sagði Hólmar.

„Maður hefur upplifað margt í þessum business. Það kom ekkert upp sem var nógu spennandi til að vera að fara aftur í annað land, burt frá fjölskyldunni. Konan var búin að elta mig í einhver tíu ár. Kannski er komin tími á að hún fái að ráða ferð.“

Smá drama undir lokin hjá Rosenborg

Hólmar var síðast hjá Rosenborg í Noregi áður en hann kom heim. Hann gekk á fund félagsins í haust og sagðist vilja fara. Félagið tók því sem svo að Hólmar væri ákveðinn í því að fara til Íslands, sem hann var ekki á þeim tíma. Svo fékk norska félagið að vita af áhuga frá Kýpur í Hólmar. „Þá fór allt í baklás. Þeir héldu að ég ætlaði að vera áfram úti,“ sagði miðvörðurinn en bætti því við að hann hafi skilið við Rosenborg í góðu.

Hólmar Örn vildi koma heim til að finna meiri stöðugleika. „Ég var orðinn þreyttur á að vera alltaf að byrja nýtt líf hér og þar, rífa allt upp með rótum og var farið að langa að prófa að setjast einhvers staðar að.“

Valur heillaði mest en launatölur eru ýktar

Fleiri félög á Íslandi sýndu Hólmari áhuga en á endanum heillaði Valur mest. „Það sem þeir eru að stefna að heillar mig mikið. Mér finnst líklegast að á þremur árum ætti maður að geta landað einhverjum titlum þarna.“

Mikið hefur verið rætt og ritað um það að  leikmenn eins og Hólmar Örn og Aron Jóhannsson fái ansi hressilega borgað hjá Val. Miðvörðurinn segir tölurnar ýktar. „Maður hefur heyrt einhverjum tölum básúnað út um allan bæ. Í mínu tilfelli er þetta stórlega ýkt.“

Fyrsti vetur Hólmars og fjölskyldu á Íslandi eftir heimkomuna hefur einkennst af gulum, appelsínugulum, ef ekki rauðum viðvörunum. Hvernig var að koma heima í svoleiðis? „Það var bara stemning. Það var að vísu helvíti slæmt þennan veturinn, en bara gaman.“

Það er að mörgu leyti ekki mjög ósvipað að spila í efstu deild hér heima og hjá þeim liðum sem Hólmar hefur verið hjá úti, að hans sögn. „Líkamlega er þetta mjög sambærilegt, hvað varðar hlaupatölur og þetta. Þú þarft að vera í toppstandi til að spila hérna heima. Maður þarf að sjá um sjálfan sig og gera þetta vel.“

Hólmar er bjartsýnn fyrir leiktíðinni með Val í Bestu deildinni. „Við erum með gríðarlega góðan mannskap. Ef við náum að slípa þetta saman ættum við að geta gert góða hluti.“

Nýtt fyrirkomulag verður á efstu deild karla í sumar. Eftir að tvöföld umferð hefur verið spiluð verður deildinni skipt í tvennt, eftir og neðri hluta. Hólmari lýst heilt yfir vel á þetta. „Fyrir áhorfandann er þetta geggjað. Ég held að þetta eigi bara eftir að gera deildinni gott. Auðvitað hefur þetta sína galla en í stóru myndinni er þetta bara spennandi.“

Sýndi bekkjarsetunni skilning lengi vel

Hólmar hætti í fyrra að gefa kost á sér í íslenska landsliðið. Hann var yfirleitt í aukahlutverki hjá landsliðinu og var spurður út í það hvort að bekkjarsetan hafi verið orðin lýjandi. „Það var orðið það. Maður var búinn að vera í þessu í einhver tíu ár, mæta samviskusamlega og gera sitt besta og setja pressu á mennina sem voru að spila,“ sagði Hólmar og bætti við að hann gerði sér grein fyrir því að mennirnir á undan honum hafi spilað mjög vel í langan tíma. Þegar kynslóðaskipti hófust í landsliðinu breyttist hins vegar viðhorfið aðeins. „Þá fannst mér ekki meika mikinn sense að vera áfram á bekknum.“

Það má sjá viðtalið í heild í spilaranum hér að neðan.