Dirk Kuyt, fyrrum leikmaður Liverpool, vonast til þess að Luis Suarez gangi til liðs við Aston Villa og spili þar undir stjórn síns gamla liðsfélaga, Steven Gerrard sem er nú knattspyrnustjóri liðsins.
Kuyt sem spilaði á sínum tíma bæði með Suarez og Gerrard hjá Liverpool segir að sá fyrrnefndi elski Gerrard.
Suarez hefur verið orðaður við brottför frá Atlético Madrid að undanförnu en hann hefur ekki verið í eins stóruhlutverki hjá liðinu og oft áður.
,,Ég vona að hann snúi aftur í ensku úrvalsdeildina en ég er ekki viss hvort það gerist,“ sagði Dirk Kuyt í samtali við Talksport.
Kuyt segir að Suarez hafi átt möguleika á því að snúa aftur til Englands þegar að hann var við það að yfirgefa herbúðir Barcelona en hann ákvað síðan á endanum að vera áfram á Spáni.
,,Ég veit að hann elskar Gerrard og vill ábyggilega vinna með honum aftur,“ sagði Dirk Kuyt, fyrrum leikmaður Liverpool.
Suarez hefur áður sagt að það gæti reynst honum mjög erfitt að spila fyrir annað lið en Liverpool á Englandi. En sú staðreynd að Steven Gerrard, goðsögn í sögu félagsins stýrir nú Aston Villa gæti auðveldað honum að ganga í raðir Aston Villa.
Kuyt spilaði með Suarez yfir tvö tímabil hjá Liverpool og hefur aðeins góða hluti um hann að segja.
,,Hann er frábær náungi. Ég lærði mikið af honum sem leikmaður en einnig sem manneskja. Sigurhugarfar hans er magnað.“