FH hefur ráðið Davíð Þór Viðarsson sem yfirmann knattspyrnumála hjá félaginu. Þetta herma öruggar heimildir 433.is.
Davíð Þór hefur nú þegar skrifað undir samning við FH en búist er við að félagið tilkynni um ráðningu hans á næstu dögum.
Davíð lét af störfum sem aðstoðarþjálfari meistaraflokks í haust en hann aðstoðaði Eið Smára Guðjohnsen, Loga Ólafsson og Ólaf Jóhannesson á einu ári.
Davíð lagði skóna á hilluna árið 2019 eftir magnaðan feril með FH. Hann lék 9 A-landsleiki á ferli sínum.
Davíð var sjö sinnum Íslandsmeistari með FH en liðið á átta titla í sögunni, Davíð lék í atvinnumennsku þegar FH varð meistari árið 2012. Hann varð einu sinni bikarmeistari með FH.
Miðjumaðurinn fyrrverandi var sex ár í atvinnumennsku en nú verður hann yfirmaður knattspyrnumála hjá uppeldisfélaginu.
Fleiri félög hafa verið að feta þessa leið að vera með yfirmann knattspyrnumála en Víkingur réð Kára Árnason í slíkt starf á dögunum. Þá er Arnar Þór Viðarsson yfirmaður knattspyrnumála hjá KSÍ auk þess að þjálfa íslenska landsliðið, Arnar og Davíð eru bræður.
