Knattspyrnusamband Íslands segir það trúnaðarmál hvernig starfslokum við Eið Smára Guðjohnsen er háttað. KSÍ mun 1 desember nýta sér uppsagnarákvæði í samningi Eiðs Smára. Frá þessu er sagt í Fréttablaðinu.
KSÍ greindi frá því á þriðjudag að Eiður Smári myndi láta af störfum og er talað um að ástæðan sé af persónulegum ástæðum hans.
Fram kom í yfirlýsingu KSÍ í gær sem Vanda Sigurgeirsdóttir skrifaði undir að málið hefði átt sér langan aðdraganda. Fleiri svör fást ekki frá formanni KSÍ sem neitar að ræða einkalíf þessa besta knattspyrnumanns í sögu Íslands.
„Það er fjallað um skilmála vegna starfsloka í ráðningarsamningi KSÍ við Eið Smára og eftir þeim er unnið, án þess að við séum að fara nánar út í hvernig þeir skilmálar eru, enda slíkur samningur trúnaðarmál,“ segir í skriflegu svari frá KSÍ við fyrirspurn Fréttablaðsins.
Arnar Þór Viðarsson, þjálfari landsliðsins, er með sama ákvæði í samningi sínum en uppsagnarákvæðið er í gildi frá 1. til 15. desember. Vanda hefur hins vegar staðfest að Arnar verði áfram þjálfari liðsins.
