TV2 skýrir frá þessu. Haft er eftir Natalia Tesli, sem vann að rannsókninni, að blanda af geðveiki og geðveikiseinkennum auki hættuna á að viðkomandi fremji alvarleg ofbeldisbrot. Niðurstaðan fékkst með því að taka sneiðmyndir af heilum þátttakendanna.
Niðurstaðan vekur upp spurningar um hvort hægt verði að nota sneiðmyndatöku af heila fólks til að kortleggja hverjir eru hugsanlega hættulegir og spá fyrir um líkurnar á að viðkomandi beiti ofbeldi. Tesli sagði að ekki væri hægt að útiloka að hægt verði að gera það í framtíðinni en fyrst verði að gera stærri rannsóknir þar sem öðrum aðferðum verði jafnframt beitt áður en þetta markmið næst.
300 manns tóku þátt í rannsókninni. 20 eru í öryggisvistun vegna afbrotaferils, 28 eru ofbeldishneigðir og hafa verið greindir með geðsjúkdóm, 58 eru geðsjúkir en eiga sér enga sögu um ofbeldi, restin er heilbrigt fólk. Allir þátttakendurnir gáfu samþykki fyrir að vera með í rannsókninni og fóru í sneiðmyndatöku.
Tesli hafði sérstakan áhuga á hvíta efninu í heilanum en það eru taugaþræðir sem tengja hin ýmsum svæði heilans saman. Líkja má þessum þráðum við „hraðbrautir“ sem flyta upplýsingar á milli staða en þessar upplýsingar mynda grundvöll fyrir hugsanir, tilfinningar og hegðun okkar. TV2 hefur eftir Tesli að greinilegt frávik hafði verið á þessu hvíta efni hjá þeim sem höfðu gerst sekir um ofbeldisbrot og þeim sem ekki höfðu beitt ofbeldi. Þetta á einnig við um þau svæði heilans sem sjá ekki um tilfinningar.
