Erling Haaland, leikmaður Borussia Dortmund, er líklega á förum frá félaginu næsta sumar og hafa mörg lið áhuga á kappanum. Þar á meðal ensku liðin Manchester United, Manchester City og Chelsea. Auk þess eru Real Madrid, PSG og Bayern Munich á höttunum eftir norska framherjanum.
Haaland getur yfirgefið Dortmund þegar klásúla hans er virkjuð en hún hljóðar upp á 75 milljónir evra. Þá vill Haaland hækka verulega í launum og fá rúmar 30 milljónir punda á ári.
Hjá Dortmund fær hann um 141 þúsund pund á viku en þegar hann færir sig um set vill hann að minnsta kosti 500 þúsund pund vikulega að því er segir í frétt ESPN.
Í fréttinni segir einnig að Real Madrid heilli hvað mest en hann er þó einnig spenntur að spila fyrir Ole Gunnar Solskjaer hjá Manchester United en þeir þekkjast vel eftir tíma þeirra saman hjá Molde.
