Hjörvar Hafliðason, íþróttastjóri Viaplay á Íslandi opnaði hlaðvarpsþátt sinn, Dr. Football, á skemmtilegri sögu frá Dannmörku.

Hjörvar hefur verið mikið í Danmörku undanfarið vegna útsendinga Viaplay frá Meistaradeild Evrópu og þar hittir hann fyrir marga kollega sína á sjónvarpsstöðinni TV3 sem vita allir hver Jón Dagur Þorsteinsson, leikmaður íslenska landsliðsins og AGF í dönsku úrvalsdeildinni er.

,,Það er leikmaður sem við eigum í Danmörku sem allir starfsmenn TV3 sport hafa skoðun á, það er Jón Dagur Þorsteinsson. Þetta er ótrúlega magnað. Hann fékk gult spjald um daginn fyrir að skora með hendinni. Daninn segir að hann sé góður knattspyrnumaður en að hann sé klikkaður,“ sagði Hjörvar í hlaðvarpsþættinum Dr. Football.

Jón Dagur hefur skapað sér nokkuð stórt nafn í danska fótboltanum undanfarin ár en hann gekk til liðs við AGF árið 2019 frá Fulham. Fyrir það hafði hann spilað með danska liðinu Vendsyssel og HK hér heima.

Hann á að baki 86 leiki með AGF og hefur skorað 19 mörk í þeim leikjum og gefið 11 stoðsendingar. Hjörvar spáir því að hann verði ekki mikið lengur hjá AGF heldur taki næsta skref upp á við á knattspyrnuferli sínum.

,,Það er svo gaman að því hvernig hann hefur komið inn í danska boltann. Það vita allir hver hann er. Það er mjög gaman hvernig Jóni Degi hefur tekist að skapa sér nafn þarna í Danmörku. Ég spái því að hann verði ekki áfram þarna í AGF,“ sagði Hjörvar Hafliðason í hlaðvarpsþættinum Dr. Football.