Stuðningsmaður enska liðsins Manhester City berst nú fyrir lífi sínu á spítala í heimabæ einnar skærustu stjörnu liðsins, Kevin De Bruyne. Maðurinn er 63 ára en ráðist var á hann á bílastæði í bænum Drongen í Belgíu.

Atvikið átti sér stað eftir leik Manchester City og Club Brugge í Meistaradeild Evrópu í gær. Leiknum lauk með 5-1 sigri Manchester City.

Samkvæmt vefmiðlinum HLN í Belgíu var stuðningsmaðurinn á leið heim eftir leikinn, nokkrir stuðningsmenn Club Brugge komu auga á hann á bláan Manchester City trefil sem hann bar á sér. Þeir tóku treflinn af honum og þegar maðurinn bað um trefilinn sinn réðust þeir á hann.

Maðurinn er hluti af stuðningsmannaklúbbi Manchester City í Belgíu sem ber nafnið Blue Moon Belgium. Sonur hans er varaformaður í klúbbnum og hann tjáði sig við HLN eftir árásina.

,,Eftir leikinn stoppuðum við á bílastæði við E40 veginn í Drongen. Ég og félagar mínir lögðum af stað en pabbi var enn að bíða eftir vinum sínum. Þar nálgaðist hann stuðningsmaður Club Brugge sem tók af honum trefilinn. Þegar pabbi bað hann um að skila honum var hann sleginn í höfuðið,“ sagði Jurgen, sonur stuðningsmannsins sem ráðist var á.