Fyrrum knattspyrnumaðurinn Kevin Campbell telur að Traore sé hinn fullkomni miðjumaður fyrir Liverpool og gæti haft mikil áhrif á leik liðsins. Samningur Traore við Wolves rennur út 2023 og hefur hann oft verið orðaður við Liverpool.

Ferill Oxlade-Chamberlain hjá Liverpool náði aldrei þeim hæðum sem búist var við en hann hefur verið mikið meiddur hjá félaginu. Campbell telur að Liverpool ætti að losa sig við Ox í janúarglugganum og kaupa Traore.

„Hann er fullkominn fyrir leikstíl Liverpool,“ sagði Campbell við Football Insider.

„Mane, Salah og Jota hafa verið frábærir á tímabilinu og ekkert hægt að setja út á þá en Traore gæti komið með eitthvað af bekknum.“

„Skiptingar munu skipta öllu máli undir lok leiktíðarinnar og hafa áhrif á titilbaráttuna. Chelsea og Manchester City eru með svona leikmenn á bekknum en ekki Liverpool.“