Það hefur ekkert gengið hjá Lionel Messi frá því að hann gekk í raðir PSG frá Barcelona. Einn besti knattspyrnumaður sögunnar hefur ekki enn fundið taktinn.
Messi kom á frjálsri sölu frá Barcelona þar sem hann hafði verið allan sinn feril. Messi vildi hins vegar ekkert fara, aðeins fjárhagsvandræði Barcelona urðu til þess.
Franskir miðlar hafa tekið saman þau vandamál sem Messi er að glíma við.
Þrátt fyrir að hafa komið til Parísar í ágúst er Messi og fjölskylda enn að leita að heimili. Fjölskyldan dvelur á hóteli og hefur gert í mánuð.
Messi og eiginkona hans hafa skoðað fjöldann af fasteignum en ekki fundið þá einu réttu.
Messi þekkir ekkert annað en að vera kóngurinn í liðinu en nú virðist það hafa breyst. Neymar og Kylian Mbappe fá meira traust í upphafi tímaibls.
Það sást best þegar liðinu vantaði mark gegn Lyon, Messi var tekinn af velli fyrir hægri bakvörðinn Achraf Hakimi.
Messi mætti til PSG í lélegu formi og er að vinna í því, nú er hann hins vegar meiddur og óvíst er hvort hann geti spilað næstu leiki.
Eftir að hafa búið í Barcelona stærstan hluta ævi sinnar er Messi sagður sakna heimahaganna. Hann talaði mikið um það þegar hann yfirgaf Barcelona að borgin væri heimili hans og hann ætti eftir að sakna þess að búa ekki í borginni.
Messi og Ronaldo hafa verið í persónulegri keppni í mörg ár og nú hallar á Messi. Á meðan Ronaldo raðar inn mörkum á Englandi er Messi í vandræðum í Frakklandi. Eftir hvert einasta mark Ronaldo fær Messi að finna fyrir því á samfélagsmiðlum.
