Óhætt er að segja að íslenskt samfélag hafi nötrað undanfarna daga út af hneykslismálum innan KSÍ sem snúast um yfirhylmingu kynferðisbrota. Sú sem opnaði rækilega á málið er kynjafræðingurinn Hanna Björg Vilhjálmsdóttir sem skrifaði harðorða grein um málið sem vakti gríðarlega athygli og setti hneykslismálið í ákveðið ferli sem endaði með því að Guðni Bergsson, formaður KSÍ sagði af sér, og skömmu síðar einnig stjórn sambandsins.

DV tók í byrjun vikunnar saman nærmynd af ferli Hönnu Bjargar sem er frumkvöðull í kynjafræðslukennslu á Íslandi og hefur lagt sitt lóð á vogarskálarnar í fjölmörgum femínskum baráttumálum.

Athygli vekur að albróðir Hönnu Bjargar er annar baráttumaður, Páll Vilhjálmsson, sem vekur reglulega umtal fyrir afdráttarlaus skrif sín á bloggsíðu sinni. Skrif hans hafa áhrif því reglulega er vitnað til þeirra í Staksteinum Morgunblaðsins.

Í stuttu samtali við DV tekur Páll heilshugar undir að vandfundnari eru systkini sem eru á jafn öndverðum meiði í samfélagsumræðunni og hann og systir hans, Hanna Björg.

„Mér þykir mjög vænt um systur mína Hönnu og við höfum lært það í gegnum tíðina að vera sammála um að vera ósammála um suma hluti í lífinu,“ segir Páll. Það var þó kannski ekki alltaf raunin og þurftu foreldrar þeirra stundum að stilla til friðar þegar systkinin tókust á.

Páll er þremur árum eldri en systir sín og að hans sögn gangi þeim í dag vel að halda samskiptunum góðum þrátt fyrir öndverðar skoðanir. „Í fjölskylduboðum sýnum við öðrum þá virðingu að ræða frekar um veðrið en samfélagsmál,“ segir Páll kíminn.