John Cohen, yfirmaður hjá Homeland Security, sagði nýlega í viðtali við CNN að ekki sé útilokað að einhverra þeirra hvatninga sem eru settar fram á Internetinu um ofbeldisverk verði að veruleika.
Homeland Security sendi á föstudaginn frá sér aðvörun um að öfgasinnar muni hugsanlega notfæra sér gildandi sóttvarnaaðgerðir til að fremja hryðjuverk í Bandaríkjunum. Segir í aðvöruninni að stress í tengslum við heimsfaraldurinn hafi orsakað aukinn þrýsting og spennu sem hafi skilað sér í fleiri áætlunum frá ofbeldissinnuðum öfgasinnum og það geti haft meira ofbeldi í för með sér á árinu.
Í samtali við CNN sagði Cohen að það væri orðanotkun á borð við „að taka gálgann fram“ og „við neyðumst til að taka málin í eigin hendur“ sem sjáist í vaxandi mæli hjá hópum öfgasinna á Internetinu. Þetta sé svipuð þróun og staða og fyrir árásina á þinghúsið. „Þetta minnir á það sem við sáum fyrir 6. janúar,“ sagði Cohen og bætti við að ekki liggi fyrir upplýsingar um ákveðin skotmörk öfgasinna eða dagsetningar hugsanlegra hryðjuverka.
Hann sagði einnig að þeir sem tóku þátt í árásinni á þinghúsið hafi ekki enn sætt sig við niðurstöðu forsetakosninganna í nóvember. Meðal þeirra gangi samsæriskenningar um að Donald Trump verði settur aftur í embætti nú í ágúst. Ef það gerist ekki muni það hafa alvarlegar afleiðingar.
