Bandaríkjastjórn hefur ákveðið að láta fara yfir skjöl varðandi hryðjuverkaárásirnar á Bandaríkin 11. september 2001 á nýjan leik til að kanna hvort hægt sé að aflétta leynd af þeim. Þetta er gert eftir að fjölskyldur þeirra sem létust í árásunum báðu Joe Biden, forseta, um að sleppa því að mæta á minningarathöfn um árásirnar og fórnarlömbin nema hann aflétti leynd af skjölum sem ættingjarnir telja að sýni tengsl sádi-arabískra leiðtoga við árásirnar.

Í yfirlýsingu frá Biden segir meðal annars: „Stjórn mín er staðráðin í að tryggja eins mikið gagnsæi og hægt er samkvæmt lögum. Ég fagna ákvörðun dómsmálaráðuneytisins í dag þar sem ákveðið er að fara í gegnum skjöl, sem áður hafði verið ákveðið að væru leynileg, og að það verði gert eins fljótt og unnt er.“

Ættingjar hinna látnu hvöttu Biden til að mæta ekki á minningarathöfn um þá tæplega 3.000 sem létust í árásunum á New York og Washington í bréfi sem þeir birtu á föstudaginn.

Sádí-arabískir ráðamenn hafa neitað því að ráðamenn hafi átt hlut að máli varðandi árásirnar en því hefur lengi verið haldið fram að þeir hafi komið að málum.

Audrey Strauss, saksóknari á Manhatta, sagði í gær að alríkislögreglan FBI hafi ákveðið að endurskoða fyrri ákvarðanir um af hverju megi ekki opinbera sumar þeirra upplýsinga sem ættingjar hinna látnu hafa farið fram á að fá.