Það virðist hafa kastast í kekki á milli Hjörvars Hafliðasonar og Mikaels Nikulássonar á íþróttabarnum Spot í Kópavogi í gær. Fjallað er um málið á Vísir.is. Í gær fór fram úrslitaleikur Evrópudeildarinnar þar sem Manchester United tapaði gegn Villarreal, halda þeir félagar báðir með rauða liðinu sem tapaði.
Um er að ræða tvær vinsælustu hlaðvarpsstjörnur landsins en Hjörvar Hafliðason stýrir Dr. Football á meðan Mikael er með sinn þátt, The Mike Show. Báðir þættir njóta vinsælda en Mikael var áður hluti af Dr. Football þættinum, báðir þættir fjalla um íþróttir en Hjörvar þó aðeins um knattspyrnu.
„Miklum sögum fer af því að þeir hafi beinlínis látið hnefana tala og Bakkus ráðandi öllum aðstæðum. En Hjörvar segir það hinar mestu ýkjur, í raun vitleysu en hann vill ekki tjá sig frekar um málið við Vísi,“ segir í frétt eftir Jakob Bjarnar á Vísir.is.
Hjörvar sjálfur sendi fylgjendum Dr. Football stutta kveðju í dag og segir þar. „Engar áhyggjur kæru leikmenn. Við Mike erum enn bestu vinir. Við leikgreindum leikinn í gær og fórum vissulega yfir sviðið. Við höfum verið að rífast frá árinu 1998 og það er ekkert að fara breytast. Okkur lenti aðeins saman í gær eins og á öllum Reiðhallaræfingum í den en erum báðir mjög sáttir í dag. Heyrumst í fyrramálið,“ skrifar Hjörvar.
