Íþróttakonan, áhrifavaldurinn og aktívistinn Edda Falak hefur vakið mikla athygli hér á landi að undanförnu. Edda hefur verið mikið í sviðsljósinu í #MeToo bylgjunni sem hefur geisað síðustu vikur. Edda var á dögunum gestur í útvarpsþættinum Sunnudagssögur á Rás 2 þar sem hún ræddi meðal annars um það hvernig hún byrjaði í aktívisma.

Edda stundaði nám við Háskóla Íslands og útskrifaðist þaðan með gráðu í viðskiptafræði. Í kjölfarið flutti hún til Kaupmannahafnar og fór þar í framhaldsnám. Í því námi var hún ein af fáum konum en stuttu eftir að hún lauk því námi byrjaði hún að vinna í fjármáladeild í stóru fyrirtæki í Danmörku.

Hlutabréf og bikinímyndir

Um sama leyti byrjaði Edda að birta myndir á samfélagsmiðlum. Umræddar myndir vöktu umtal þar sem hún var fáklædd á þeim. „Ég geri stelpulega hluti á Instagram, pósta myndum af mér á bikiníinu og geri alls konar fimleika og er fáklædd, á sama tíma og ég er í virtri stöðu í fjármálafyrirtæki,“ segir Edda en fljótlega fékk hún skilaboð sem fóru ekki vel í hana.

„Þú getur ekki verið með mikilvæga kúnna þar sem þú ert að „treida“ hlutabréfum á meðan þú ert á Instagram á bikiníinu,“ var álit sem margir virtust hafa í kringum Eddu á þessum tíma. Þá fann hún fyrir því að ekki var hlustað á hana á fundum í vinnunni og svo virtist vera sem skoðanir hennar hefðu ekki jafn mikið vægi og skoðanir annarra.

„Það fauk í mig“

Edda segir að síðan hafi hún fengið skilaboð þar sem henni var bent á að breyta því hvernig hún klæddi sig svo hún yrði frekar tekin alvarlega. Edda var ekki sátt með þessi skilaboð og mótmælti þeim. „Það fauk í mig því mig langaði að gera bæði,“ segir hún í þættinum.

Á Instagram lét hún skoðanir sínar á þessu óréttlæti flakka og fann þá fyrir miklum stuðningi frá öðrum konum. „Þannig byrjaði þetta,“ segir hún. „Þú getur gert bæði og þú ert ekki að lítillækka þig með því að birta mynd af þér á bikiníinu.“

Eftir þetta hætti hún í vinnunni í fjármáladeildinni hjá fyrirtækinu og flutti heim til Íslands. Hér hélt hún áfram að leggja stund á aktívismann og hefur hún fengið mikla athygli fyrir það, sérstaklega undanfarið.