Áhrifavaldurinn Brynjólfur Löve, eða Binni Löve eins og hann er betur þekktur, greindi nýlega frá því að hann fær reglulega óumbeðnar nektarmyndir frá konum. Hann sagði frá þessu í útvarpsþættinum Ísland vaknar í vikunni. K100 greinir frá.
Brynjólfur er vinsæll áhrifavaldur með tæplega 19 þúsund fylgjendur á Instagram og verkefnastjóri stafrænna miðla hjá Árvakri.
Tilhugalíf Brynjólfs hefur verið talsvert í fréttum undanfarið. Hann og íþróttakonan Edda Falak áttu í stuttu en mjög opinberu sambandi sem lauk í mars síðastliðnum.
Sjá einnig: Binni Löve og Edda Falak hætt saman
Í þættinum segist Brynjólfur ekki vera að leita sér að ástarsambandi í augnablikinu, allavega ekki meðvitað. En það þýðir ekki að konur séu ekki að leita að honum og segist hann fá reglulega alls konar skilaboð, sum hver ansi gróf og gætu jafnvel talist misbjóða blygðunarsemi.
Jón Axel, einn þáttastjórnandi Ísland vaknar, spyr Brynjólf: „Er einhver dúkka að detta inn í kantinn hjá þér?“
„Ég hef aldrei verið rólegri í þessum efnum sem er skrýtið fyrir mig,“ segir Brynjólfur. „Ég þarf ekkert meira en sjálfan mig.“
Kristín Björgvins, þáttastjórnandi, spyr þá hvort hann fái stundum „ósæmileg skilaboð“.
„Já. Eftir að það kom frétt um daginn [að ég væri á lausu] og síðan þá hef ég verið að fá alls konar skilaboð,“ segir Brynjólfur.
Talið berst að óumbeðnum typpamyndum og segir Brynjólfur konur ekkert vera neitt síðri þegar kemur að senda þannig skilaboð. „Ég get alveg sagt þér það að ég fæ jafnoka þessara typpamynda í inboxið hjá mér. Óumbeðið,“ segir Brynjólfur.
Horfðu á brotið úr þættinum hér að neðan.
