Fyrr í dag var greint frá því að íþróttakonan Edda Falak og áhrifavaldurinn Binni Löve hafa ákveðið að hætta saman og fara í sitthvora áttina.

Fylgjendur Eddu á Instagram virðast hafa miklar áhyggjur af henni og segist hún hafa fengið yfir hundrað skilaboð í dag. Hún birti þess vegna stutta tilkynningu í Instagram Story um sambandsslitin.

Edda segir að það sé komið „svolítið síðan“ að hún „batt enda á samband mitt við Binna sem stóð yfir í þrjá mánuði.“

Það var fyrst greint frá því að Edda og Binni væru að stinga saman nefjum í nóvember í fyrra. Síðustu mánuði hafa þau verið mjög dugleg að birta myndir og myndbönd af hvort öðru. Þau njóta bæði mikilla vinsælda á Instagram, Binni er með yfir 18 þúsund fylgjendur og Edda yfir 26 þúsund.

Hér að neðan má lesa tilkynningu Eddu í heild sinni.

„Elsku vinir. Ég veit að mér ber engin skylda að segja/svara neinu en í kjölfar allra frétta í dag á DV/Mbl/Fréttablaðinu að þá hef ég fengið yfir 100 skilaboð. Þið þurfið ekki að senda mér fleiri samúðarkveðjur,“ segir hún og bætir við hláturs- og hjartatjákni (e. emoji).

„Ég skil það vel að þetta fylgir því að vera opin persóna en það er nú svolítið síðan ég batt enda á samband mitt við Binna, sem stóð yfir í þrjá mánuði. Takk fyrir áhugan og takk fyrir að spyrja. Engar áhyggjur af mér að hafa elsku vinir.“