Á tveimur árum hefur þeim sem svelta í löndum á borð við El Salvador og Gvatemala fjölgað mikið eða fjórfalt að sögn Matvælaaðstoðar Sameinuðu þjóðanna. Ástandið hefur einnig versnað mjög í mörgum öðrum Mið-ameríkuríkjum.

Í El Salvador, Gvatemala, Hondúras og Níkaragva hafa næstum átta milljónir manna glímt reglulega við hungur á þessu ári. Þetta eru fjórfalt fleiri en 2018.

Matvæla- og landbúnaðarstofnun Sameinuðu þjóðanna skilgreindi á síðasta ári hungur sem tímabil þar sem fólk býr við alvarlegan skort á mat. Það er að segja að það geta liðið dagar á milli þess sem það fær mat eða aðrar nauðsynjar.

Ástæðan fyrir fjölgun í hópnum má rekja til blöndu af atvinnuleysi í heimsfaraldrinum, efnahagslegra þrenginga og náttúruhamfara.

Auk Miðameríkuríkjanna er talið að í framtíðinni geti svipuð staða komið upp í Bandaríkjunum og Mexíkó.